*కేవలం అక్షరాలకేనా ప్రాధాన్యత?**మన పురాణాల గురుకులం నేటి చదువులకు నేర్పే జీవన పాఠం!

నేటి ఉదయం ఏ ఇంట్లో చూసినా ఒకటే దృశ్యం... బస్సు టైమైపోతోందని కంగారుగా పరుగుపెట్టే పిల్లలు, చేతిలో ప్రోగ్రెస్‌ కార్డు పట్టుకుని ఉత్తమ గ్రేడుల కోసం ఆరాటపడే తల్లిదండ్రులు! ఆధునిక విద్యా విధానం పుణ్యమా అని ఈరోజు చదువు అనేది కేవలం శాతాలు, గ్రేడుల పోటీగా మారిపోయింది. ఏ ర్యాంక్ వచ్చింది? ఏ కాలేజీలో సీటు వస్తుంది? ఇదే నేటి చదువుల పరమార్థం అయిపోయింది.

కానీ, ఒక్కసారి మన పురాణాల వైపు, మన మూలాల వైపు తిరిగి చూసుకుంటే... భారతదేశ గడ్డపై విరాసిల్లిన 'గురుకుల విద్యా విధానం' చదువును ఒక వ్యాపారంగానో, ఒకరితో ఒకరిని పోల్చే పోటీగానో చూడలేదు. అది అక్షరాలతో పాటు సంస్కారాన్ని నూరిపోసి, ఒక పరిపూర్ణమైన మనిషిని తయారుచేసే జీవన విధానం!

పురాణాలు ఏం చెబుతున్నాయి? గురుకులం అంటే కేవలం తరగతి గది కాదు!

మన రామాయణ, మహాభారతాలను పరిశీలిస్తే...

సాక్షాత్ శ్రీరాముడు వసిష్ఠ మహర్షి ఆశ్రమంలో, శ్రీకృష్ణుడు సాందీపని మహర్షి గురుకులంలో సామాన్యులలాగే విద్యనభ్యసించారు. మహారాజుల బిడ్డలైనా సరే, గురుకులానికి వస్తే అందరూ సమానమే. అక్కడ రాజులకు ఏ ప్రత్యేక సదుపాయాలూ ఉండేవి కావు.

నేటి ఏసీ రూములు, లగ్జరీ స్కూల్ బస్సులు పిల్లలకు భౌతిక సుఖాలను ఇస్తున్నాయేమో కానీ, జీవితాన్ని తట్టుకునే మానసిక ధైర్యాన్ని ఇవ్వలేకపోతున్నాయి. గురుకులంలో లభించిన ఆ ఐదు అమూల్యమైన పాఠాలు ఇవే:

1. ర్యాంకుల ఒత్తిడి లేదు... వ్యక్తిగత ప్రతిభకే ప్రాధాన్యత!

నేటి పాఠశాలల్లో పిల్లవాడి తెలివితేటలను కేవలం 100 మార్కుల పేపర్‌తోనే అంచనా వేస్తున్నారు. కానీ, గురుకులంలో 'పరీక్షల భయం' ఉండేది కాదు. అక్కడ ప్రతి విద్యార్థిలోని ప్రత్యేక సృజనాత్మకతను గురువు గుర్తించేవారు. భీముడికి గదాయుద్ధం, అర్జునుడికి విలువిద్య, యుధిష్ఠిరుడికి ధర్మశాస్త్రం... ఇలా ఎవరి ఆసక్తులకు, మానసిక సామర్థ్యానికి అనుగుణంగా వారిని తీర్చిదిద్దేవారు తప్ప, అందరినీ ఒకే మూసలో పోసి ఒకరితో ఒకరిని పోటీ పడేలా చేయలేదు.

2. క్రమశిక్షణ, శ్రమ విలువ (Dignity of Labour)

గురుకులంలో చదువుకునే శిష్యులు స్వయంగా అడవికి వెళ్లి సమిధలు (కట్టెలు) సేకరించాలి, ఆశ్రమాన్ని శుభ్రం చేయాలి, తోటపని చేయాలి. చివరకు భిక్షాటన చేసి తెచ్చుకున్న ఆహారాన్ని అందరూ సమానంగా పంచుకోవాలి. దీనివల్ల అహంకారం నశించి, పని పట్ల గౌరవం, శ్రమ విలువ తెలిసేవి. నేటి పిల్లలకు ఇంట్లో అన్నీ చేతికే అందుతుండటం వల్ల, బయటి సమాజంలో చిన్న కష్టం వస్తేనే తట్టుకోలేక మానసికంగా కుంగిపోతున్నారు.

3. ప్రకృతితో అనుబంధం – సామాజిక స్పృహ

గురుకులాలు అడవుల్లో, చెట్ల నీడన, ప్రకృతి ఒడిలో సాగేవి. పక్షులు, జంతువులు, చెట్లతో కలిసి బతకడం వల్ల పిల్లల్లో పర్యావరణ స్పృహ, కరుణ అలవడేవి. నేటి పిల్లలు నాలుగు గోడల మధ్య, కంప్యూటర్ స్క్రీన్ల ముందు కాలం గడుపుతూ సమాజానికి, ప్రకృతికి పూర్తిగా దూరమైపోతున్నారు.

4. బాధ్యత గల పౌరులుగా తీర్చిదిద్దడం (Character Building)

"విద్య దదాతి వినయం" అన్నారు పెద్దలు

చదువుకు అసలైన అందం వినయం. గురుకులం కేవలం సమాచారాన్ని తలకెక్కించేది కాదు, ఉత్తమ క్యారెక్టర్‌ను (క్యారెక్టర్ బిల్డింగ్) నిర్మించేది. కష్టకాలంలో ఎలా నిలబడాలి? పెద్దలను ఎలా గౌరవించాలి? సమాజం పట్ల మన బాధ్యత ఏంటి? అనే అపారమైన అవగాహనను అక్కడ నేర్పేవారు. అందుకే అప్పట్లో చదువుకున్నవారు దేశాన్ని ఏలే ఉత్తమ పాలకులుగా, ధర్మాన్ని రక్షించే మహానుభావులుగా మారారు.

5. గురు-శిష్యుల పవిత్ర బంధం

నేటి స్కూళ్లలో ఫీజు కడితే చదువు చెప్పే 'వ్యాపార బంధం' మాత్రమే ఎక్కువగా కనిపిస్తోంది. కానీ గురుకులంలో గురువు అంటే తండ్రితో సమానం. శిష్యుడిని తన సొంత బిడ్డలా చూసుకునే పవిత్రమైన బంధం అది. అందుకే గురువు చెప్పిన మాట శిష్యుడి జీవన వికాసానికి బాటలు వేసేది.

ఆధునిక తల్లిదండ్రులూ... ఒక్కసారి ఆలోచించండి!

ఈ వ్యాసం ఉద్దేశం పిల్లలను ఇప్పుడే అడవులకు పంపమని కాదు! కానీ, మారుతున్న కాలంలో మనం కోల్పోతున్న సాంప్రదాయ విలువలను తిరిగి మన పిల్లలకు అందించాల్సిన బాధ్యత మనపై ఉంది.

• మీ పిల్లవాడికి అత్యుత్తమ గ్రేడులు రాకపోయినా ఫర్వాలేదు, కానీ తోటి మనిషిని గౌరవించే సంస్కారం ఉందా లేదా చూసుకోండి.

• పరీక్షల్లో ఆశించిన ఫలితం రాకపోతే జీవితమే అయిపోలేదనే ధైర్యాన్ని, ఒత్తిడిని తట్టుకునే మానసిక స్థైర్యాన్ని ఇంట్లోనే నేర్పండి.

• పుస్తకాల్లోని జ్ఞానంతో పాటు, సమాజంలో ఒక ఉత్తమ పౌరుడిగా ఎలా బతకాలో ప్రాక్టికల్ విషయాలను పరిచయం చేయండి.

ముగింపు:

ర్యాంకులు, గ్రేడుల భారాన్ని పిల్లల తలపై మోపి వారిని కేవలం 'డబ్బులు సంపాదించే యంత్రాలుగా' మార్చకండి. వారికి సమాజం పట్ల బాధ్యతను, క్రమశిక్షణను, మంచి క్యారెక్టర్‌ను ఆస్తిగా ఇవ్వండి. మన పురాణాల గురుకులం మనకు నేర్పిన అసలైన పరమార్ధం ఇదే! మీ పిల్లవాడిని కేవలం ఒక పోటీదారుడిగా కాకుండా... సమాజానికి ఉపయోగపడే ఒక ఉత్తమమైన మనిషిగా తీర్చిదిద్దండి.

Dr.Rambabu Ankam.