జెల్లీ ఫిష్ పేరెంటింగ్: వెన్నెముక లేని ప్రేమే పిల్లలకు శాపమా?

 జెల్లీ ఫిష్ పేరెంటింగ్: వెన్నెముక లేని ప్రేమే పిల్లలకు శాపమా?

మనస్తత్వవేత్త డయానా బామ్రిండ్ దీనిని "పర్మిసివ్ పేరెంటింగ్" అని పిలిచారు

నేటి ఆధునిక సమాజంలో పెంపకం ఒక కొత్త మలుపు తిరిగింది. అది 'జెల్లీ ఫిష్ పేరెంటింగ్'. జెల్లీ ఫిష్‌కు వెన్నెముక ఎలా ఉండదో, ఈ పద్ధతిలో పిల్లల పట్ల కఠినమైన నియమాలు లేదా క్రమశిక్షణ అనే 'వెన్నెముక' ఉండదు. ప్రేమ పుష్కలంగా ఉన్నా, బాధ్యత నేర్పని ఈ పద్ధతిపై ఒక ప్రత్యేక విశ్లేషణ.

1. చారిత్రక నేపథ్యం: నిరంకుశత్వం నుండి నిస్సారత వైపు..

ఈ మార్పు వెనుక ఒక బలమైన చరిత్ర ఉంది.

• నాటి నిరంకుశత్వం :20వ శతాబ్దపు మధ్యకాలం వరకు పెంపకం చాలా కఠినంగా ఉండేది. "తల్లిదండ్రులు చెబితే వేదవాక్కు.. ఎదురు ప్రశ్న వేయకూడదు" అనే నియంతృత్వ ధోరణి ఉండేది.

• ప్రతిచర్య :ఆ కఠినమైన ఆంక్షలు, భయం మధ్య పెరిగిన నాటి పిల్లలే నేటి తల్లిదండ్రులు. తాము అనుభవించిన ఆ భయం, ఆంక్షలు తమ పిల్లలకు వద్దనుకుని, అటు నుండి ఇటు మరో విపరీత కోణానికి చేరుకున్నారు. ఫలితమే నేటి 'జెల్లీ ఫిష్' పద్ధతి.

2. సామాజిక మార్పులు: గిల్ట్ మరియు సింగిల్ చైల్డ్ కల్చర్

నేడు కుటుంబాలు చిన్నవయ్యాయి. తల్లిదండ్రులు ఇద్దరూ ఉద్యోగస్తులు కావడం వల్ల పిల్లలకు సమయం ఇవ్వలేకపోతున్నామనే 'అపరాధ భావం' పెరిగింది. ఆ గిల్ట్‌ను పోగొట్టుకోవడానికి, పిల్లలు అడిగినవన్నీ ఇవ్వడం, వారిని అసలు మందలించకపోవడం వంటివి చేస్తున్నారు. "పిల్లవాడు ఏడ్వకూడదు, వాడికి నచ్చింది వాడిని చేయనిద్దాం" అనే ఆలోచనే దీనికి మూలం.

3. వాస్తవిక ఉదాహరణలు:

• భారతీయ సందర్భం: మన చుట్టూ ఉన్న ఐటీ దంపతులను గమనిస్తే.. తమ ఏకైక సంతానం అల్లరి చేసినా, ఫోన్‌కు బానిసైనా మందలించరు. "రోజంతా ఆఫీసులో ఉంటాం, ఇంటికొచ్చాక వాడిని తిట్టి వాడికి దూరం కాలేం" అనే బలహీనతే జెల్లీ ఫిష్ పేరెంటింగ్.

• సినిమాటిక్ ఉదాహరణ: 'బొమ్మరిల్లు' చిత్రంలో సిద్ధార్థ్ తల్లి పాత్రను గమనిస్తే.. తండ్రి అతిగా నియంత్రించే 'హెలికాప్టర్' అయితే, తల్లి మాత్రం పిల్లలకు అతిగా స్వేచ్ఛనిస్తూ, తప్పు చేసినా మందలించలేని జెల్లీ ఫిష్ తరహాలో ఉంటుంది.

• అంతర్జాతీయ ఉదాహరణ: హాలీవుడ్ నటుడు విల్ స్మిత్ తన పిల్లలకు చిన్నప్పటి నుందే విపరీతమైన స్వేచ్ఛను ఇచ్చారు. ఫలితంగా వారు సృజనాత్మకంగా ఎదిగినా, సామాజిక నియమాల విషయంలో విమర్శలు ఎదుర్కొన్నారు.

4. పర్యవసానాలు: మెత్తని వ్యక్తిత్వం.. పెళుసైన భవిష్యత్తు

ప్రేమ దొరుకుతుంది కానీ, జీవిత సవాళ్లను ఎదుర్కొనే 'నిబ్బరం' దొరకదు. క్రమశిక్షణ లేని పెంపకం వల్ల పిల్లలు:

1. బయటి ప్రపంచపు చిన్నపాటి ఒత్తిడిని కూడా తట్టుకోలేకపోతున్నారు.

2. ప్రతిదీ సులభంగా దొరుకుతుందనే భ్రమలో పెరిగి, ఏదైనా దక్కనప్పుడు కుంగిపోతున్నారు.

3. సరైన మార్గదర్శకత్వం లేక క్లిష్ట పరిస్థితుల్లో నిర్ణయాలు తీసుకోలేక అయోమయానికి గురవుతున్నారు.

ముగింపు: స్వేచ్ఛకు 'దారం' ఉండాలి!

గాలిపటం ఆకాశంలో ఎత్తుకు ఎగరాలంటే దానికి 'దారం' అనే కట్టుబాటు ఉండాలి. ఆ దారమే గాలిపటం దారి తప్పకుండా చూసే భరోసా.

"పిల్లలకు ఆకాశమంత స్వేచ్ఛను ఇవ్వడం 'ప్రేమ' అయితే.. ఆ ఆకాశంలో వారు దారి తప్పకుండా చూసే దిక్సూచిగా మారడమే 'నిజమైన పెంపకం'."

తల్లిదండ్రులూ.. ప్రేమ అంటే పిల్లలు అడిగినవన్నీ చేయడం కాదు, రేపటి ప్రపంచాన్ని తట్టుకునేలా వారిని సిద్ధం చేయడం.

మీరేమంటారు? 

మీ అభిప్రాయాలను కామెంట్ల రూపంలో తెలియజేయండి!

Dr.Rambabu Ankam