పిల్లల పెంపకం: సముద్రపు అలల నుండి మనం నేర్చుకోవాల్సిన పాఠాలు

 

జీవితంలో మనం తరచుగా వినే మాట.. "ఈ రోజు బిజీగా ఉన్నాను, రేపటి నుండి నిన్ను ప్రేమిస్తాను". ఇది ఎంత విడ్డూరంగా ఉంటుందో ఆలోచించండి. కానీ మనలో చాలామంది పిల్లల విషయంలో, వారి భవిష్యత్తు విషయంలో అవకాశాల కోసం వేచి చూస్తూ ఇలాగే సమయాన్ని వృథా చేస్తుంటాం.

జీవితం మనకు ఇచ్చే ప్రతి అవకాశం మరో అడుగు ముందుకు వేయడానికే తప్ప, ఒడ్డున కూర్చుని కేవలం ప్రేక్షక పాత్ర పోషించడానికి కాదు. ముఖ్యంగా మీ పిల్లలను ఒక బాధ్యతాయుతమైన వ్యక్తులుగా తీర్చిదిద్దాలంటే, వారిని ఈ రోజే ప్రేమించడం, అర్థం చేసుకోవడం మొదలుపెట్టండి.

అలన్ వాట్స్ దృక్పథం: పిల్లలు - సముద్రపు అలలు

బ్రిటిష్ తత్వవేత్త అలన్ వాట్స్ (Alan Watts) పిల్లల స్వభావాన్ని సముద్రపు అలలతో పోల్చారు. సముద్రం నుండి అలలు ఎలాగైతే విడదీయలేనివో, ఈ ప్రపంచం నుండి మీ పిల్లలు కూడా అంతే. వారు ఇక్కడ అపరిచితులు కారు, ఈ ప్రకృతిలో భాగమే.

సముద్రంలో తరంగాలను మనం ఎలాగైతే ఆపలేమో, ఎదిగే పిల్లల ఆలోచనలను, వారి ఎదుగుదలను కూడా మనం ఆపలేము. మనం చేయగలిగిందల్లా, ఆటుపోట్లని వారు ఎలా ఎదుర్కోవాలో నేర్పించడమే. మనం నిశ్చలంగా ఉండిపోతే అలలు మనల్ని ముంచెత్తుతాయి. అలాగే పిల్లలను సరైన రీతిలో తీర్చిదిద్దకపోతే, వారు రేపటి సమాజంలో ఒత్తిళ్లకు లోనయ్యే ప్రమాదం ఉంది.

బుద్ధుడి బోధన: ప్రతి అడుగు ఒక కొత్త ప్రారంభం

గౌతమ బుద్ధుడు తన జీవిత చరమాంకంలో ఒక గొప్ప మాట చెప్పారు: "నేను ప్రతిసారి ప్రతిదాన్ని కొత్తగానే మొదలు పెడతాను".

పిల్లల పెంపకం విషయంలో ఇది అక్షర సత్యం.

• మొదటి బిడ్డను పెంచినట్టుగా రెండో బిడ్డను పెంచలేం.

• ఒకరి పెంపకం మరొకరికి నమూనా కాలేదు.

• ప్రతి బిడ్డ ఒక ప్రత్యేకమైన వ్యక్తిత్వం కలిగిన వారు.

పిల్లల పెంపకం అనేది ఒక ముగింపు లేని ప్రక్రియ. ప్రకృతిలోని ప్రతిదీ ఒక ప్రవాహం లాంటిది, మన పిల్లలు కూడా అంతే. వారిని ఎప్పటికప్పుడు కొత్తగా అర్థం చేసుకుంటూ, వారికి అనంతమైన అవకాశాలను పరిచయం చేస్తూ ముందుకు సాగాలి.

ముగింపు: వికసించే పువ్వులా మీ బిడ్డ

బురదలో పుట్టిన తామర పువ్వు తన రంగుతో, అందంతో ప్రపంచాన్ని ఎలా సమ్మోహన పరుస్తుందో, మన పిల్లలు కూడా ఈ ప్రపంచాన్ని ప్రభావితం చేసే స్థాయికి ఎదగాలి. ఒక్క రోజులో వికసించి రాలిపోయే పువ్వు కూడా తన జీవితాన్ని పరిపూర్ణంగా గడుపుతుంది. మరి రేపటి ప్రపంచాన్ని నడిపించాల్సిన మీ పిల్లలు ఇంకెంత అద్భుతంగా ఎదగాలి?

వారికీ ఆత్మవిశ్వాసాన్ని నూరిపోస్తూ, ప్రతి రోజూ వారిని కొత్తగా ప్రేమిస్తూ ముందుకు సాగండి. అప్పుడే వారిని ఉన్నతమైన వ్యక్తులుగా మనం తీర్చిదిద్దగలం.

Dr.Rambabu Ankam